لاہور( سپورٹس رپورٹر)ڈائریکٹر جنرل سپورٹس پنجاب محمد عامر جان نے کہا ہے کہ پاکستان میں ہاکی کا بہت ٹیلنٹ ہے اور سپورٹس بورڈ پنجاب اس ٹیلنٹ کو سامنے لانے کیلئے بھرپور اقدامات کررہا ہے۔ جشن آزادی کے موقع پر کھیلوں کے مقابلے منعقد کئے جارہے ہیں جن سے نئے کھلاڑی ابھر کر سامنے آرہے ہیں۔ ان خیالات کا اظہار انہوںنے پیر کے روز منی ہاکی سٹیڈیم میں 71 ویں جشن آزادی انٹر سکول ہاکی ٹورنامنٹ کے فائنل میچ کے موقع پر میڈیا سے گفتگو کرتے ہوئے کیا۔ڈائریکٹر جنرل سپورٹس پنجاب محمد عامر جان نے کہا کہ سپورٹس بورڈ پنجاب ہاکی کے فروغ کیلئے کام کررہا ہے، ہاکی کی ترقی اور کھلاڑیوں کو بہترین سہولتوں کی فراہمی کے لئے منی ہاکی سٹیڈیم کی تعمیر نو کی گئی ہے اس میں آسٹروٹرف بھی بچھائی گئی ہے اور نئی فلڈ لائٹس بھی لگائی گئی ہے۔ اس کے علاوہ سٹیڈیم میں تمام سہولتیں فراہم کی گئی ہیں تاکہ کھلاڑی لگن کے ساتھ کھیل میں حصہ لے سکیں ، فلڈ لائٹس کی تنصیب سے اب کھلاڑی 24گھنٹے ہاکی کھیل سکتے ہیں۔ انہوں نے کہا کہ منی ہاکی سٹیڈیم سے ٹاپ کلاس کھلاڑی ابھر کر سامنے آئیں گے جس سے ملک میں ہاکی بہتر ہو گی۔ ہاکی اولمپئن نوید عالم نے ہاکی کے فروغ کیلئے سپورٹس بورڈ پنجاب کی جانب سے کئے گئے اقدامات پر ڈی جی سپورٹس کا شکریہ ادا کرتے ہوئے کہا کہ ان اقدامات سے ہاکی کا کھیل دوبارہ اپنا کھویا ہوا مقام حاصل کرلے گا۔