لاہور(سپورٹس رپورٹر+نمائندہ سپورٹس) پاکستان سکواش فیڈریشن نے 14 سال بعد خیبرپی کے کو بین الاقوامی سکواش مقابلوں کی میزبانی دےدی ۔رواں ماہ کے آخر میں مقابلوں کا انعقاد کیا جائے گا۔پاکستان سکواش فیڈریشن نے خیبرپی کے کو بھی بین الاقوامی ایونٹ کے انعقاد کی میزبانی کرنے کا موقع دے دیا ہے اور رواں ماہ کے آخر میں 14 سال بعد سکواش کے بین الاقوامی مقابلوں کا انعقاد کیا جائے گا۔اس حوالے سے سکواش کے سابق عالمی چیمپئین قمر زمان نے بتایا کہ مصر، انگلینڈ، ہانگ کانگ، کینیڈا اور دوسری ٹیموں نے پشاور میں کھیلنے پر اپنی خواہش کا اظہار کیا ہے اور بین الاقوامی مقابلوں کے شیڈول کے لیے ورلڈ سکواش فیڈریشن کو خط لکھ دیا ہے۔ان کا کہنا تھا کہ بین الاقوامی مقابلے15 سے 25 ہزارڈالر انعامی رقم کے عوض کرائے جائیں گے، سکواش کے فروغ کے لیے نامزد وزیراعظم عمران خان سے بھی ملنے کا فیصلہ کیا گیا ہے اور پاکستان سکواش فیڈریشن کے صدر بہت جلد سابق عالمی چیمپئینز کے ہمراہ عمران خان سے ملیں گے۔قمر زمان نے کہاخیبرپی کے کو پشاور میں خواتین کے بین الاقوامی مقابلوں کی میزبانی بھی دی جارہی ہے، بین الاقوامی مقابلوں کے لیے سپانسر شپ کی ضرورت ہے۔

حکومت کو بھی تعاون کرنا ہوگا۔