شیخوپورہ: لین دین کے تنازع پر فروٹ منڈی میں فائرنگ، 2آڑھتی قتل، ایک زخمی
شیخوپورہ (نمائندہ نوائے وقت+ نمائندہ خصوصی) فروٹ منڈی شیخوپورہ میں سودا دوسرے بیوپاری کو دینے پر مشتعل ہو کر ملزموں نے فائرنگ کرکے 2آڑھتیوں کو قتل، ایک کو زخمی کر دیا۔ تفصیلات کے مطابق ذوالفقار نامی بیوپاری جو کہ پہلے پرویز لاہوری نامی آڑھت پر اپنا مال فروخت کرنے کیلئے لاتا تھا جس کا لین دین بھی چل رہا تھا مگر پیر کے روز اس نے پرویز لاہوری کی آڑھت کی بجائے مہر شہزاد کی آڑھت پر اپنا مال فروخت کرنے کیلئے رکھا جس پر پرویز لاہوری نے اسے اپنے بقایا جات ادا کرنے کا کہا جس پر مہر شہزاد نے مداخلت کرتے ہوئے تکرار شروع کردی اور فون کرکے اپنے ساتھیوں کو بلالیا جس کی کال پر آنے والے اسکے ساتھیوں نے اندھا دھند فائرنگ کردی جس کی زد میں آکر آڑھتی پرویز لاہوری اور بلال موقع پر جان بحق ہوگئے جبکہ علی نامی نوجوان کو زخمی حالت میں ڈی ایچ کیو ہسپتال پہنچایا گیا جہاں ا بتدائی طبی امداد کے بعد اسے تشویشناک حالت کے تحت میوہسپتال لاہور ریفر کردیا گیا، پولیس نے نعشیں تحویل میں لیکر پوسٹ مارٹم کیلئے بھجوا دیں اور موقع سے فرار ہوجانے والے ملزمان کی گرفتاری کیلئے چھاپے مارے جارہے ہیں۔
