اوکاڑہ (آئی این پی) سابق وزیر اعظم بے نظیر بھٹو کی پولیٹکل سیکرٹری ناہید خان نے کہاکہ گرینڈ اپوزیشن سے زرداری کی منافقانہ سوچ کا پول کھل کر سامنے آگیا۔ جمعہ کو آر یو جے پاکستان کے مرکزی رہنما نے اوکاڑہ کے سینئر صحافیوں کے وفد سے خصوصی گفتگو کرتے ہوئے کہاکہ عمران خان کی محنت رنگ لے آئی۔ عمران خان نے بہت بڑے وعدے کئے ہیں اللہ کرے کہ وہ اس میں کامیاب ہو جائیں۔ پی پی پی نے وزیر اعظم کو ووٹ نہ دیکر پی پی کی سیاست ختم کر دی، انہوں نے ابھی بھی ڈبل گیم کی، عمران خان کی نظر میں اچھے اور عوام کے سا منے ہم اس الیکشن کا حصہ نہیں جبکہ یہ خود اس نظام کے حصہ دار ہیں، انہوں نے سندھ میں پہلے سے 6 سیٹیں زیادہ لیں اور سندھ میں کیا کچھ ہوا سب کو معلوم ہے۔ زرداری نے سپیکر اور ڈپٹی سپیکر کے ووٹ تو لے لئے لیکن جب شہباز شریف کو ووٹ دینے کی باری آئی تو تحفظات یاد آگئے یہ عمران خان کے سامنے اپنے آپ کو کلیئرکرنا ہے، کرپشن کے مزید کیس سامنے نہ آئیں۔ انہوں نے کہا کہ گرینڈ اپوزیشن سے زرداری کی منافقانہ سوچ کا پول کھل کر سامنے آگیا۔ آصف زرداری منافقوں کے کھیل کے سب سے اچھے کھلاڑی ہیں۔