عید قربانی کا سبق، ایثار محبت کا اظہار ہے کینیڈین وزیراعظم، سب کو مبارک ہو، برطانوی ہائی کمشنر کا مویشی منڈی سے اردو میں پیغام
ٹورنٹو/ اسلام آباد (نیٹ نیوز+ نوائے وقت رپورٹ) کینیڈین وزیراعظم جسٹن ٹروڈو نے کینیڈا سمیت دنیا بھر کے مسلمانوں کو عیدالاضحیٰ کی مبارکباد دی ہے۔ ٹویٹ پیغام میں جسٹن ٹروڈو نے کہا کہ ’عید کا دن قربانی کا سبق اور ضرورت مندوں سے ایثار و محبت کا اظہار کرتا ہے، تمام برادریوں کے لوگ ایک ساتھ نماز عید ادا کرتے ہیں، پکوانوں کا تبادلہ کرتے ہیں اور زندگی میں حاصل نعمتوں کا شکر ادا کرتے ہیں‘۔ عیدالاضحیٰ سب کے لیے ایک موقع ہے کہ کینیڈین مسلمانوں کے حوالے سے سب کچھ جان سکیں جو ہمارے ملک کو بہتر بناتے ہیں اور اختلافات کو مٹاتے ہیں۔ ادھر برطانوی ہائی کمشنر تھامس ڈریو نے اردو میں مویشی منڈی سے اپنے پیغام میں کہا ہے کہ میرے مسلمان دوست عیدالاضحی منائیں گے۔ جانوروں کی قربانی دیکھ کر اچھا لگا۔ ہماری ٹیم کی جانب سے تمام مسلمانوں کو دلی مبارکباد ہو۔
