آئی جی سندھ سے کراچی باسکٹ بال ایسوسی ایشن کے صدر غلام محمد خان کی ملاقات
لاہور(سپورٹس ڈیسک)انسپکٹر جنرل سندھ پولیس امجد جاوید سلیمی سے کراچی باسکٹ بال ایسوسی ایشن کے صدر غلام محمد خان نے ملاقات کی۔ اس موقع پر ایڈیشنل آئی سندھ آفتاب پٹھان، ایس ایس پی ملیر شیراز نذیر، باسکٹ بال آرگنائزر محمد فاروق خان اور ذوالفقار عباس خان بھی موجود تھے۔کراچی باسکٹ بال ایسوسی ایشن کی جانب سے ہفتے کو جاری کردہ اعلامیے کے مطابق غلام محمد خان نے عید الاضحی پر حفاظتی انتظامات کے حوالے سے سندھ پولیس کے بہترین انتظامات کو سراہتے ہوئے آئی جی سندھ کو مبارکباد پیش کی۔غلام محمد خان نے آئی جی سندھ سے سندھ پولیس گولڈ کپ انٹر ڈویڑن باسکٹ بال ٹورنامنٹ کے انعقاد کی درخواست کی جو انہوں نے قبول کرتے ہوئے ایڈیشنل آئی آفتاب پٹھان کو ہدایت کی کہ ٹورنامنٹ کے انعقاد کے حوالے سے اگلے ہفتے اجلاس منعقد کیا جائے تاکہ ٹورنامنٹ شایان شان انداز میں منعقد ہو سکے۔ اس موقع پر آئی جی سندھ نے غلام محمد خان سے کہا کہ میری جانب سے تمام کھلاڑیوں اور سپورٹس آرگنائزروں کو عید الاضحی کی دلی مبارکباد پیش کریں۔
