لاہور(سپورٹس رپورٹر) پاکستان واٹر اینڈ پاور ڈویلپمنٹ اتھارٹی (واپڈا) نے اپنی کراٹے کی کھلاڑی نرگس کو 18ویں ایشین گیمز میں خواتین کے 68کلوگرام سے زائد وزن کی کیٹیگری مقابلوں میں برونز میڈل جیتنے پر مبارک باد دی ہے۔واپڈا کی کھلاڑی نرگس ایشین گیمز میں کراٹے مقابلوں میں برونز میڈل جیتنے والی پہلی پاکستانی خاتون ہیں۔ چیئرمین واپڈا اور واپڈا سپورٹس بورڈ کے پیٹرن انچیف لیفٹیننٹ جنرل مزمل حسین (ریٹائرڈ) اور دیگر اعلیٰ آفیسرز نے کراٹے کی کھلاڑی نرگس کی اعلیٰ کارکردگی کا مظاہرہ کرنے پر تحسین کی ہے اور امید ظاہر کی ہے کہ واپڈا کے کھلاڑی مستقبل میں ملکی اور بین الاقوامی سطح پر ملک کانام روشن کرتے رہیں گے۔