آرمی چیف سے ملاقات‘ کرغز سفیر نے دہشت گردی کے خلاف پاکستانی قربانیوں کو سراہا
راولپنڈی(آئی این پی)آرمی چیف جنرل قمر جاوید باجوہ سے کرغزستان کے سفیرایرک بیشمبیف نے ملاقات کی جس میں خطے کی سلامتی کی صورتحال سمیت دوطرفہ دلچسپی کے دیگر امور پر تبادلہ خیال کیا۔ منگل کو پاک فوج کے شعبہ تعلقات عامہ (آئی ایس پی آر) کے مطابق کرغزستان کے سفیر ایرک بیشمبیف نے جنرل ہیڈکوارٹرز راولپنڈی کا دورہ کیا اور آرمی چیف جنرل قمر جاوید باجوہ سے ملاقات کی جس میں علاقائی سکیورٹی کی صورتحال سمیت باہمی دلچسپی کے دیگر امور پر تبادلہ خیال کیا گیا۔ اس موقع پر کرغزستان کے سفیر نے دہشت گردی کے خلاف جنگ اور قیام امن کیلئے پاکستان کی کوششوں اور قربانیوں کا اعتراف کرتے ہوئے انہیں سراہا۔
