شمالی وزیرستان، سکیورٹی فورسز پر فائرنگ، ایک اہلکار زخمی، قلات میں بم دھماکہ، ایک شخص ہلاک
کوئٹہ ‘بنوں، قلات ( بیورو رپورٹ ‘آن لائن+ نوائے وقت رپورٹ) شمالی وزیرستان میں سکیورٹی فورسز کے قافلے پر فائرنگ کے نتیجے میں ایک اہلکار زخمی ہوگیا۔ ذرائع کے مطابق شمالی وزیرستان کی تحصیل بویہ کے علاقہ محمد خیل میں گزشتہ روز گشت پر مامور سکیورٹی فورسز کی گاڑی پر نامعلوم حملہ آور نے فائرنگ کی جس کے نتیجے میں سکیورٹی فورسز کا اہلکار زخمی ہو گیا۔ سکیورٹی فورسز نے حملہ آور کی گرفتاری کیلئے سرچ آپریشن شروع کر دیا۔دریں اثنا نیمرغ قلات کے علاقے میں بم دھماکہ ایک شخص جاں بحق ہوگیا جس میں متعدد افراد زخمی ہو گئے۔ سکیورٹی فورسز نے علاقے کو گھیرے میں لے لیا۔ دریںاثنا سکیورٹی فورسز نے نوشکی کے علاقے خیرانیہ ناکے میں سرچ آپریشن کیا جس دوران فائرنگ کے تبادلے میں ایک حملہ آور مارا گیا جبکہ 11 مشتبہ افراد کو گرفتار کرلیا گیا۔ ہلاک و گرفتار افراد سے اسلحہ، دستی بم اور گاڑیاں برآمد کرلی گئیں۔
