لاہور (اے این این) وفاقی وزیر ریلویز شیخ رشید احمد نے کہا ہے کہ پاکستان ریلو ے اپنے شہداء و غازیوں کو نہیں بھولی اور اُن کی قربانیوں کو سلام پیش کرتی ہے۔ یوم شہداء پر شہداء کو خراج عقیدت پیش کرنے کے لیے پاکستان ریلوے بھی پیش پیش ہے۔ مختلف ٹرینوں کی بوگیوں پر یوم دفاع کی مناسبت سے دفاع وطن کے لیے جانیں قربان کرنے والے شہداء کی خصوصی تصویریں اور پیغامات آویزاں کئے گئے ہیں تاکہ شہداء کی قربانیوں کو یاد رکھا جائے۔ جن ٹرینوں پر یہ سکن آویزاں کی گئی ہیں ان میں تیزگام، پاکستان ایکسپریس، جعفر ایکسپریس اور گرین لائن ٹرینیں شامل ہیں۔ گزشتہ روز تین ٹرینوں کے ساتھ خصوصی تصاویر اور پیغامات والی بوگیاں لگائی گئی تھیں اور آج بھی تین ٹرینوں کے ساتھ بوگیاں لگائی گئی ہیں جن میں پاکستان ایکسپریس، تیز گام اور گرین لائن ٹرینیں شامل ہیں۔