فار ورڈ کہوٹہ: جیپ کھائی میں گر گئی‘ 4 افراد جاں بحق‘ 29 زخمی
حویلی کہوٹہ (اے این این + صباح نیوز) ناگہ ناڑی سے فارورڈ کہوٹہ آنے والی مسافر جیپ پتھرہ کے مقام پر اوور لوڈنگ کے باعث موڑ کاٹتے سینکڑوں فٹ گہری کھائی میں جا گری۔ 4 افراد جن میں اصغر خان ولد نجیب اللہ خان راٹھور، محمد ریاض و لد محمد عارف ، محمد قاسم ولد سائیں، شرافت ولد خادم حسین موقع پر جاں بحق جبکہ 29 شدید زخمیوں کو سی ایم ایچ پہنچا دیا گیا۔ حادثے کی جگہ گاڑیاں نہ ہونے کی وجہ سے زخمیوں کو ہسپتال پہنچانے میں شدید مشکلات کا سامنا کرنا پڑا جبکہ حادثے کے قریب سرکاری ڈسپنسری نہ ہونے کی وجہ سے بھی زخمیوں کو فوری ابتدائی ٹریٹمنٹ نہ دی جا سکی جس کی وجہ سے ہسپتال پہنچنے تک بہت سے زخمیوں کا خون بہہ گیا۔ اس مسافر جیپ میں 33 افراد سوار تھے۔ حادثہ انتا خوفناک تھا کہ دور دور تک گاڑی کے گرنے کی آواز سنائی دی۔ بڑی تعداد میں مقامی لوگ جائے حادثہ پر پہنچ گئے اور زخمیوں کو نکال کر روڈ تک پہنچایا۔
