نئی دہلی (صباح نیوز)سابق بھارتی وزیراعظم منموہن سنگھ نے کہا ہے کہ نریندرا مودی کی حکومت اقتصادی ، زرعی اور ہمسایوں کے ساتھ تعلقات سمیت تمام محاذوں پر ناکام ہوچکی ہے۔ عوام ترقی کے سرکاری دعو ئوں سے متاثر نہیں ہیں۔ کانگریس کے رہنما کیپل سبل کی کتاب کی تقریب رونمائی سے خطاب کرتے ہوئے انہوں نے کہا کہ ملک کو آج جس زرعی بحران کا سامنا ہے اس سے حکومت اچھی طرح نہیں نمٹ سکی۔کسانوں کو اب تک اس بات کا یقین نہیں کہ انہوں نے جو پیداوار دی ہے اس کا انہیں مناسب معاوضہ ملے گا۔ انہوں نے کہا سبل نے جو کتاب تحریر کی ہے اس میں مودی حکومت کی4 سالہ دور کا بھرپور اور جامع تجزیہ پیش کیا گیا، حکومت نے عوام سے 2014 کے لوک سبھا انتخابات میں جو وعدے کیے تھے وہ انہیں پورا کرنے میں ناکام رہی اور اس کتاب میں اس کی بھرپور تفصیلات فراہم کی گئیں۔