قصور، شیخوپورہ (نامہ نگار+ نمائندہ خصوصی) قصور کے گردونواح میں غیراعلانیہ طویل لوڈشیڈنگ نے لوگوں کی زندگی اجیرن بنا دی۔ کاروبار شدید متاثر اور معاملات زندگی مفلوج ہو گئے، لوگوں نے احتجاج کیا ہے۔ قصور اور گردونواح میں شہروں میں 12گھنٹے اور دیہاتوں میں بجلی نہ ہونے کے برابر ہے لوگ پانی کی بوند بوند کو ترس گئے ہیں۔ مسجدوں میں وضو کے لیے بھی پانی موجود نہیں جبکہ کاروبار ٹھپ ہو کر رہ گیا ہے اور مزدوروں کے گھروں کے چولہے ٹھنڈے پر گئے ہیں، قصور کے سیاسی وسماجی حلقوں نے وزیراعظم عمران خان اور وزیراعلیٰ سے نوٹس کا مطالبہ کیا ہے۔ دریں اثنا شیخوپورہ میں سوئی گیس کی بندش میں اضافہ کردیا گیا ہے جس کے باعث گھریلو صارفین کیلئے رات 9 سے لیکر صبح 6 تک گیس بند رہنے سے ان کیلئے کھانا پکانا مشکل ہوگیا جس پر شہریوں نے شدید احجاج کیا ہے۔