اسلام آباد/ راولپنڈی (سٹاف رپورٹر+نوائے وقت رپورٹ) آرمی چیف جنرل قمر جاوید باجوہ سے برطانوی ہائی کمشنر نے ملاقات کی۔ آئی ایس پی آر کے مطابق ملاقات میں باہمی دلچسپی کے امور، علاقائی سکیورٹی صورتحال پر تبادلہ خیال کیا گیا۔ برطانوی ہائی کمشنر نے پاک برطانیہ تعلقات کی بہتری کیلئے کام جاری رکھنے کا عزم کیا۔ علاوہ ازیں آرمی چیف جنرل قمر جاوید باجوہ کا کہنا ہے نوجوان ملک کی بہتری کیلئے ہمیشہ کوشاں رہیں، نوجوان ہمیشہ خود سے سوال کریں کہ وہ ملکی بہتری کیلئے کیا کر سکتے ہیں۔ پاک فوج کے شعبہ تعلقات عامہ کے مطابق آرمی چیف نے نیشنل یونیورسٹی آف سائنس اینڈ ٹیکنالوجی کا دورہ کیا۔ یونیورسٹی پہنچنے پر ریکٹر لیفٹیننٹ جنرل (ر) نوید زمان نے آرمی چیف کا استقبال کیا۔ جنرل قمرجاوید باجوہ نے نسٹ یونیورسٹی کی بین الاقوامی رینکنگ میں بہتری کو سراہا۔ ان کا کہنا تھا کہ نسٹ پاکستان کی بہترین یونیورسٹی ہے، یہ انتہائی ماہر انجینئرز اور سکالرز پیدا کرنے میں اہم کردار ادا کر رہی ہے، کوئٹہ قیام کے بعد تمام صوبوں میں نسٹ کے کیمپس قائم کیے جائیں گے۔ جنرل قمر جاوید باجوہ نے ہدایت کی کہ نسٹ جیسا نمائندہ ادارہ چاروں صوبوں میں ہونا چاہئے۔
آرمی چیف