ڈیرہ بگٹی(آن لائن) بلوچستان کے علاقے ڈیرہ بگٹی میں نامعلوم مسلح افراد کی فائرنگ سے قبائلی امن لشکر کے تین رضا کار شہید‘ دو زخمی ہوگئے۔ اطلاعات کے مطابق ڈیرہ بگٹی کے علاقے دشت وگوران میں ہفتے اور اتوار کے درمیانی شب نامعلوم افراد نے قبائلی امن لشکر کے کمانڈر ہارون شمبانی کے کیمپ پر گھات لگا کر حملہ کردیا۔ فائرنگ سے 3 رضاکار موقع پر ہی شہید ہوگئے جبکہ فائرنگ کی آواز سن ساتھیوں کی مدد کو آنے والے افراد کی موٹر سائیکل راستے میں شرپسندوں کی جانب سے بچھائی گئی لینڈ مائن پر چڑھنے کے باعث دو افراد شدید زخمی ہوگئے جنہیں فوری طور پر قریبی ہسپتال منتقل کردیا گیا، حالت خطرے سے باہر بتائی گئی۔ جاں بحق ہونے والوںکی شناخت غلام شریف، پیربخش اور طاہر کے نام سے کی گئی جو کہ شمبانی قبائل سے تعلق رکھتے تھے اور نواحی علاقے بیہہ لوٹی کے ہی رہائشی ہی بتائے گئے۔ جبکہ زخمی کی شناخت ریزغ اور حفیظ اللہ کے نام سے کی گئی۔ واقعے کی اطلاع ملتے ہی سیکورٹی فورسز نے علاقے کو گھیرے میں لے کر دہشتگردوں کی تلاش شروع کردی تاہم آخری اطلاعات آنے تک کوئی گرفتاری عمل میں نہ لائی جاسکی تھی۔
رضا کار / شہید