لاہور (خصوصی رپورٹر) وزیراعلیٰ عثمان بزدار نے ’’کاشانہ‘‘ اور سوشل ویلفیئر کمپلیکس میں بے سہارا بچوں کیلئے قائم ادارے گہوارہ، خصوصی افراد کیلئے قائم ادارے نشیمن، بے سہارا بزرگوں کیلئے قائم ادارے عافیت، ذہنی امراض میں مبتلا افراد کے ادارے دارالسکون، بچوں کے ادارے چمن میں دو گھنٹے تک ان اداروں میں رہے اور انہوں نے بے سہارا اور معذور بچوں و بچیوں کے ساتھ وقت گزارا اور ان کے ساتھ شفقت کا اظہار کیا اور انہیں پیار کیا۔ وزیراعلیٰ نے عافیت میںرہائش پذیر بزرگ مرد و خواتین سے ملاقات کی اور ان کے مسائل پوچھے۔ بزرگوں نے وزیراعلیٰ کی آمد پر خوشی کا اظہار کیا اور ان سے گفتگوکرتے ہوئے کہا کہ آج تک کوئی وزیراعلیٰ یہاں نہیں آیا اور آپ کا یہاں آنا حقیقی تبدیلی ہے اور یہی عمران خان کا نیا پاکستان ہے۔ بزرگ مرد و خواتین نے وزیراعلیٰ عثمان بزدار کو دعائیں دیں اور ان کے لئے نیک خواہشات کا اظہار کیا اور کہا کہ آپ نے یہاں آ کر ہمارے مسائل سنے اور دلجوئی کی جس پر ہمیں بہت مسرت ہوئی ہے اور ہم آپ کی کامیابی کے لئے دعاگو ہیں۔