بھائی پھیرو/ وزیرآباد/ اوکاڑہ (صباح نیوز + نامہ نگاران) ملتان روڈ پر چاہ کلانوالہ کھوہ پر ٹریفک حادثے میں دو افراد موقع پرجاں بحق ہوگئے۔ پانچ گاڑیاں آپس میں ٹکرا گئیں، زخمیوں کو ہسپتال پہنچا دیا گیا۔ مرنے والے دیپالپور کے رہائشی بتائے جاتے ہیں تاہم ابھی نام شناخت نہیںہوسکی۔ حادثہ کی وجہ سے ٹریفک کی میلوں لمبی لائنیں لگ گئیں۔ پولیس نے نعشیں اور گاڑیاں قبضہ میں لے کر کاروائی شروع کر دی۔ علاوہ ازیں وزیرآباد میں تیزرفتارکار کی موٹرسائیکل کو ٹکر سے داماد فخر عباس اور سسر جاں بحق ہوگئے۔ حادثہ کار سواروں کی تیز رفتاری کے باعث پیش آیا جو شراب کے نشہ میں دھت تھے۔ اوکاڑہ سے نامہ نگار کے مطابق حویلی لکھا سے بونگا حیات جانیو الی موٹر سائیکل کو کوسٹر کی ٹکر سے دو نوجوان جاں بحق ہو گئے۔ نواحی گائوں مڑا شریف بصیر پور کا سردار وٹو نامی نوجوان اپنے ساتھی کے ہمراہ موٹر سائیکل پر سوار حویلی لکھا سے بونگا حیات باہیوال میلہ دیکھنے جا رہے تھے کہ مخالف سمت سے آنے والی تیز رفتار کوسٹر نے ٹکر دے ماری۔