انٹرنیشنل سکواش چیمپئن شپ‘پاکستان کے چاروں کھلاڑی کوارٹر فائنل میں پہنچ گئے
لاہور (سپورٹس رپورٹر+نمائندہ سپورٹس) پنجاب سکواش ایسوسی ایشن کے زیراہتمام انٹرنیشنل مینز سکواش چیمپئن شپ کے دوسرے روز پاکستانی کھلاڑی چھائے رہے ، چار پاکستانی کھلاڑیوں عاصم خان، طیب اسلم ، اسرار احمد اور فرحان محبوب نے غیرملکی کھلاڑیوں کو شکست دے کر کوارٹرفائنلز کیلئے کوالیفائی کرلی۔پہلے میچ میں عاصم خان نے ہم وطن عماد فرید کو ، میزان گومال (مصر) نے ہنری لینگ( ہانگ کانگ) کو ۔ طیب اسلم (پاکستان) کے خلاف ہانگ کانگ کا کھلاڑی چی ہم وانگ دوسری گیم میں ریٹائرڈ ہرٹ ہوگیا اور طیب اسلم نے کوارٹرفائنل کیلئے کوالیفائی کیا۔ یوسف سلمان (مصر) نے رابرٹ ڈونر (انگلینڈ) کو، فرحان محبوب (پاکستان) نے ہانگ کانگ کے تیز کیون لو کو ، اگسٹا ڈیوفورڈ (فرانس) نے ہانگ کانگ کے تنگ منگ ہانگ کو ، پاکستان کے اسرار احمد نے محمد شفیق کمال کو ، آئوین یون (ملائیشیا) کے سید علی نے مصطفی شاہ بخاری (پاکستان) کو ہرا کرکوارٹرفائنل کیلئے کوالیفائی کرلیا ہے۔
