دبئی (اے پی پی) امید آصف کی شاندار بائولنگ کی بدولت پاکستان اے نے نیوزی لینڈ اے کرکٹ ٹیم کو پہلے ٹی ٹونٹی میچ 8 وکٹوں سے ہرا کر تین میچوں کی سیریز میں 1-0 کی برتری حاصل کرلی۔ پاکستانی بائولرز کی تباہ کن بائولنگ کی بدولت نیوزی لینڈ کی پوری ٹیم 12.2 اوورز میں 65 رنز بناکر آئوٹ ہوگئی اور اس نے پاکستان اے ٹیم کو میچ میں کامیابی کے لئے 66 رنز کا ہدف دیا۔ پاکستانی بائولرز کے سامنے نیوزی لینڈ اے کی ٹیم بالکل بے بس نظر آئی اور یکے بعد دیگرے پویلین لوٹتی چلی گئی اسکے 9 کھلاڑی دوہرا ہندسہ بھی عبور نہ کر پائے۔ پاکستان اے کی طرف سے امید آصف نے پانچ، وقاص اور شاہین شاہ نے دو، دو جبکہ رضا نے ایک کھلاڑی کو پویلین کی راہ دکھائی۔ جواب میں پاکستان اے ٹیم نے مطلوبہ ہدف 12.5 اوورز میں 2 وکٹوں کے نقصان پر حاصل کرلیا۔ افتخار احمد نے ناقابل شکست 26 رنز بنائے۔