بیجنگ(صباح نیوز+اے ایف پی )چین کے وسطی شہر چونگ کنگ کے ایک کنڈرگارٹن سکول میں ایک خاتون نے چاقو سے حملہ کرکے 2 بچوں کو ہلاک جبکہ 12 کو زخمی کردیا۔ امریکی نشریاتی ادارے سی این این کی ایک رپورٹ کے مطابق واقعہ چونگ کنگ کے ضلع بانان میں پیش آیا، جہاں بچوں پر خاتون نے اس وقت حملہ کیا، جب وہ مقامی وقت کے مطابق صبح ساڑھے 9 بجے ایکسرسائز کے بعد کلاس میں واپس آئے۔ جس کے بعد سکول سکیورٹی گارڈز اور عملے نے خاتون کو قابو کیا۔چاقو کے وار سے زخمی ہونے والے 14 بچوں کو طبی امداد کے لیے ہسپتال منتقل کردیا گیا، جہاں 2 بچے دم توڑ گئے۔ دوسری جانب حملے میں ملوث 39 سالہ خاتون کو پولیس نے گرفتار کرلیا۔پولیس کے مطابق واقعے کی تحقیقات جاری ہیں۔ واضح رہے کہ چین میں بچوں پر حملے کا یہ کوئی پہلا واقعہ نہیں ہے۔ اس سے قبل رواں برس اپریل میں چینی صوبے شان ژی کے ایک مڈل سکول میں چاقو سے حملے کے نتیجے میں 9 طالب علم ہلاک ہوگئے تھے۔2017میں بھی ایک کنڈرگارٹن سکول میں ایک شخص نے چاقو سے حملہ کرکے 11طالب علموں کو موت کے گھاٹ اتار دیا تھا۔

چین / حملہ