لاہور (سپورٹس رپورٹر+نمائندہ سپورٹس )قومی ٹیم کے آل راؤنڈر محمد حفیظ کا کہنا ہے کہ ہر میچ آخری سمجھ کر کھیل رہا ہوں۔ قومی ٹیم میں واپسی کا موقع ملنے پر ذہن بنایا تھا کہ ہر میچ کیریئر کا آخری میچ سمجھ کر بہتر سے بہترکارکردگی دکھانے کی کوشش کروں گا، خوش ہوں کہ بیٹ اور بال دونوں سے پرفارمنس ٹیم کے کام آئی جبکہ بائولنگ پر بڑی محنت کی ہے صرف بیٹسمین کے طور پر کھیلتے ہوئے اس چیز کی کمی بڑی شدت سے محسوس کرتا رہا۔محمد حفیظ کا کہنا تھا کہ آصف علی کے ساتھ بیٹنگ کرتے ہوئے پلان تھا کہ 160 تک کا مجموعہ بہتر ہوگا لیکن وکٹیں گرنے سے تھوڑی مشکل پیش آئی، بہرحال آخر میں آنے والے بیٹسمینوں کے اچھے سٹروکس نے ہمیں بہتر ٹوٹل حاصل کرنے میں مدد دی، بعد ازاں بائولرز نے اپنا کام کر دکھایا، کیویز نے بہت اچھی بائولنگ اور فیلڈنگ کی لیکن پاکستان ٹیم جیت کے جذبہ سے سرشار ہونے کی وجہ سے کم بیک کرتے ہوئے سیریز کا فاتحانہ آغاز کیا۔