لاہور (سپورٹس رپورٹر+نمائندہ سپورٹس ) پاکستان اور نیوزی لینڈ کی اے کرکٹ ٹیموں کے درمیان دومیچوں پر مشتمل سیریز کا پہلا چار روزہ میچ ڈرا ہو گیا ۔ میچ کے آخری دن کیویز اے ٹیم کو جیت کیلئے310رنز کا ہدف ملا ‘مہما ن ٹیم چار وکٹوں پر 164رنز بناسکی ۔ پاکستان اے ٹیم نے دوسری اننگز 241رنز تین کھلاڑی آئوٹ پر ڈکلیئر کردی تھی ۔ شان مسعود نے میچ میں مسلسل دوسری سنچری سکور کی اور 100رنز بناکر آئوٹ ہوئے ۔ عابد علی اکسٹھ ‘عثمان صلاح الدین پچاس رنز بناکر نمایاں رہے ۔ کیویز اے ٹیم کے ینگ چوہتر‘رویندرا ستائیس اور واٹلنگ سینتالیس رنز بناکر نمایاں رہے ۔ میر حمزہ ‘وقاص احمد‘کاشف بھٹی اور سعود شکیل نے ایک ایک کھلاڑی کو آئوٹ کیا ۔ پاکستان اے ٹیم نے پہلی اننگز میں 9وکٹوں پر 346رنز جبکہ کیویز اے ٹیم نے 9وکٹوں پر 278رنز بنائے تھے ۔