لاہور(سپورٹس رپورٹر+نمائند سپورٹس) پاکستان فٹبال پریمیئر لیگ میںخان ریسرچ لیبارٹریز نے کراچی پورٹ ٹرسٹ کو0-1 سے مات دے دی۔کے آر ایل نے بھرپور حملے کئے لیکن کے پی ٹی کے دفاعی کھلاڑی سیسہ پلائی دیوار بنے رہے۔ بالآخر کے آر ایل کے عمیر علی نے کھیل کے 81 ویں منٹ میں فیصلہ کن گول داغ دیا، کے پی ٹی ٹیم خسارے سے نکلنے میں ناکام رہی۔ نیوی نے آرمی کو 1-2 سے شکست دے دی، نیوی نے جارحانہ آغاز کرنے کے بعد 15 ویں منٹ میں ہی برتری حاصل کر لی جب عبدالرحمان نے بال کو جال کی راہ دکھائی۔آرمی کی طرف سے جوابی حملوں کا سلسلہ جاری رہا، بالآخر متین نے پہلا ہاف ختم ہونے سے چند لمحے قبل گول داغ کر مقابلہ برابر کردیا۔عبدالرحمان نے 49 ویں منٹ میں دوبارہ حریف کا دفاع پاش پاش کرتے ہوئے نیوی کو برتری دلائی جو ڈیفینڈرز نے کھیل کے اختتام تک برقرار رکھی۔