لاہور (سپورٹس ڈیسک)جنوبی افریقہ نے آسٹریلیا کو تیسرے ون ڈے میں چالیس رنز سے شکست دے کر سیریز دو ایک سے جیت لی ۔ فاتح ٹیم نے کپتان فف ڈوپلیسی اور ڈیوڈ ملر کی سنچریوں کی بدولت 5وکٹوں کے نقصان پر 320رنز بنائے ۔ کینگروز ٹیم شان مارش کی سنچری کی باوجود 9وکٹوں کے نقصان پر 280رنز بناسکی ۔ میزبان آسٹریلیا نے ٹاس جیت کر فیلڈنگ کا فیصلہ کیا جو مہنگا ثابت ہوا۔ پروٹیز بلے بازوں نے میزبان بائولر ز کی درگت بناڈالی ۔ ابتدائی تین وکٹیں جلد گرنے کے بعد کپتان فف ڈوپلیسی اور ڈیوڈ ملر نے کینگرو ز کی ایک نہ چلنے دی ۔ کوئنٹن ڈی کاک چار ‘ہینڈرکس آٹھ اور مارکرم بتیس رنز بناکر آئوٹ ہوئے ۔ کپتان فف ڈ وپلیسی نے 125اور ڈیوڈ ملر نے 139رنز کی اننگز کھیلی۔ کلاسین ایک اور پری ٹوریئس ایک رن پر ناٹ آئوٹ رہے ۔ مچل سٹارک اور سٹونس نے دو دو جبکہ جوش ہیزل ووڈ نے ایک کھلاڑی کو آئوٹ کیا ۔ آسٹریلیا کی ہدف کے تعاقب میں ابتدائی وکٹیں جلد گر گئیں تاہم بعد میں مڈل آرڈر بلے بازوں نے سنبھال لیا ۔ کر س لین صفر ‘کپتان ایرون فنچ گیارہ ‘سپیئر ہیڈ چھ ‘سٹونس تریسٹھ ‘گلین میکس ویل پینتیس ‘مچل سٹارک صفر ‘ایڈم زمپا صفر پر آئوٹ ہوئے ۔ شان مارش نے 106رنز کی اننگز کھیلی مگر وہ ٹیم کو جیت نہ دلاسکے ۔ پیٹ کمنز سات اور جوش ہیزل ووڈ صفر پر ناٹ آئوٹ رہے ۔ ڈیل سٹین اور کا گیسو ربادا نے تین تین ‘پری ٹوریئس نے دو جبکہ نگیڈی نے ایک کھلاڑی کو آئوٹ کیا ۔ ڈیوڈ ملر کو میچ اور سیریز کا بہترین کھلاڑی قرار دیا گیا ۔