لاہور(سپورٹس رپورٹر+نمائندہ سپورٹس)آئی سی سی ویمنز ورلڈ ٹی ٹوئنٹی میں نیوزی لینڈ نے پاکستان کو 54 رنز سے شکست دیدی۔پاکستان ویمن کرکٹ ٹیم نے ٹاس جیت کر پہلے فیلڈنگ کا فیصلہ کیا۔ نیوزی لینڈ نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 144رنز بنائے اور جیت کیلئے پاکستان کو 145رنز کا ہدف دیا۔پاکستان کی جانب سے عالیہ ریاض اور ثنا میر نے دو، دو کھلاڑیوں کو پویلین کی راہ دکھائی۔ہدف کا تعاقب کرتے ہوئے پاکستان کی ٹیم 18 اوورز میں 90 رنز پر آئوٹ ہو گئی۔ کپتان جویریہ خان 36، ندا ڈار 11 اور عالیہ ریاض نے 12رنز کی اننگز کھیلی جبکہ باقی کوئی کھلاڑی ڈبل فگر میں بھی داخل نہ ہوسکی۔واضح رہے کہ پاکستان ٹیم ٹورنامنٹ میں آئرلینڈ کے خلاف صرف ایک میچ جیت سکی ہے۔میچ کے بعد دونوں ٹیمیں سیمی فائنل کی دوڑ سے باہر ہو چکی ہیں ۔