لاہور(سپورٹس رپورٹر+نمائندہ سپورٹس) ویٹرنز ورلڈ کپ میں شرکت کیلئے قومی ویٹرنز کرکٹ ٹیم آج 17 نومبر بروز ہفتہ کو تھائی ائرویز کے ذریعے آسٹریلیا روانہ ہوگی۔ ٹورنامنٹ 21 نومبر تا 5 دسمبر تک جاری رہے گا۔ جس میں آسٹریلیا، نیوزی لینڈ، انگلینڈ، سائوتھ افریقہ، سری لنکا، کینیڈا اور ویلز سمیت 8 ٹیمیں شرکت کریں گی۔ ٹورنامنٹ سنگل لیگ کی بنیاد پر کھیلا جائے گا اور ہر ٹیم 7 میچز کھیلے گی۔ 18 رکنی سکواڈ میں سابق ٹیسٹ کرکٹر اعجاز احمد کپتان، غلام علی نائب کپتان، نواب عاشق حسین قریشی مینجر، جبکہ کھلاڑیوں میں شاہد انور، غفار کاظمی، دستگیر بٹ، بابر الطاف بٹ، ملک عامر توصیف، جاوید حفیظ، امتیاز تاررڑ، جعفر قریشی، عاصم جاہ، صغیر عباس، آصف حیات، ساجد علی، مظہر حسین اور ظفر علی شامل ہیں۔