لاہور(سپورٹس ڈیسک ) پاکستان کرکٹ بورڈ کے منیجنگ ڈائریکٹر کیلئے 9 امیدواروں کو شارٹ لسٹ کرلیاگیا ہے جن کے انٹرویوز کا سلسلہ کل یا پرسوں سے شروع ہوگا۔ پاکستان کرکٹ بورڈ کے منیجنگ ڈائریکٹر کے لیے مجموعی طورپر 150 کے قریب درخواستیں موصول ہوئی تھیں جن میں سے 9 مطلوبہ قابلیت اور معیار پر پورا اترسکے ہیں، جن کے انٹرویوز کا سلسلہ پیر یا منگل سے شروع ہوگا۔اسد علی خان، جاوید ضیا اور ایک ایچ آر کے نمائندے پر مشتمل پی سی بی کی 3 رکنی کمیٹی موزوں 2 سے 3 امیدوار کا چناؤ کرکے اپنی سفارشات چیئرمین پی سی بی کودیں گے۔ مالی معاملات طے ہونے کے بعد گورننگ بورڈ ممبران کی حمایت سے ایک امیدوار کا تقرر کیا جائے گا۔ذرائع کے مطابق گورننگ بورڈ ممبران کو ایم ڈی کی تعیناتی کے سلسلے میں ایک سرکلر بھجوایا گیا تھاجس کے تحت انہوں نے اس کی منظوری دے دی ہے، اگلے مرحلے میں آئین میں ترامیم کی جائے گی۔بورڈ سربراہ احسان مانی اپنے متعدد بیانات میں ایم ڈی کی تقرری کو لازمی قرار دے چکے ہیں۔