لاہور ( سپورٹس رپورٹر) نیپال ہاکی ٹیم اور پنجاب دانش سکول رحیم یا ر خان کی ہاکی ٹیموں کے مابین دوستانہ میچ نیپال کی ٹیم نے صفر کے مقابلے میں پانچ گول سے جیت لیا۔ ایل ڈی اے سپورٹس کمپلیکس جوہر ٹاؤن ہاکی گراؤنڈ میں کھیلے جانے والے میچ کے مہمان خصوصی پاکستان ہاکی فیڈریشن کے سیکریٹری شہباز سینئر تھے۔ میچ کے آغاز سے ہی نیپال کی ٹیم کا پلڑا بھاری رہا۔ نیپال کی ٹیم کے کپتان رام سا نے (2)منوج نے(2) جبکہ راجندر نے ایک گول سکور کیا۔ دانش سکول کی ٹیم نے پانچ پنیلٹی کارنر حاصل کیے لیکن کوئی بھی گول کرنے میں کامیاب نہ ہو سکی۔ میچ کے اختتام پر مہمان خصوصی شہباز سینئر نے کھلاڑیوں میں شیلڈ تقسیم کی۔