لاہور (نمائندہ سپورٹس )قومی کرکٹرز پی ایس ایل فور میں صلاحیتوں کے جوہر دکھانے کیلئے بے تاب ہیں۔اپنے پیغام میں کوئٹہ گلیڈی ایٹرزکے کپتان سرفراز احمد نے کہاکہ گزشتہ ایونٹس میں عمدہ کارکردگی کی بدولت ہم نے بڑی تعداد میں شائقین کو اپنا پرستار بنایا،ٹیم اس بار نیشنل سٹیڈیم میں فائنل کھیل کر ٹرافی اٹھانے کیلئے پر عزم ہے۔چھٹی ٹیم کے کپتان شعیب ملک نے کہا کہ پی ایس ایل فور کیلئے متوازن سکواڈ منتخب کیا گیا،سٹیون سمتھ اور شاہد آفریدی سے فتح گر کارکردگی کی امیدیں ہیں۔لاہور قلندرز کے کپتان محمد حفیظ نے کہا کہ ہم دنیا کی بہترین لیگز میں سے ایک پی ایس ایل میں عمدہ کارکردگی دکھانے کیلئے پْرعزم ہیں،اے بی ڈی ویلیئرز کی خدمات حاصل ہونے سے سکواڈ متوازن ہوگیا، حریفوں کا ڈٹ کر مقابلہ کریں گے۔کراچی کنگز کے کپتان عماد وسیم نے کہا کہ شہرقائد اور لاہور میں8میچز کا انعقاد بڑی اچھی خبر ہے،بہترین کارکردگی دکھاتے ہوئے کراچی میں ہوم کراؤڈ کے سامنے میچ کھیلنے کیلئے پْرعزم ہیں۔اسلام آباد یونائیٹڈ نے تاحال کپتان کا فیصلہ نہیں کیا، ٹیم کے مینٹور وقار یونس نے کہاکہ ہمیںکئی میچ ونرز کی خدمات حاصل ہیں، اعزاز کا دفاع کرنے کی ہر ممکن کوشش کریں گے۔پشاور زلمی کے ویسٹ انڈین کپتان ڈیرن سیمی بھی ایونٹ کے حوالے سے پْرجوش ہیں،انھوں نے کہا کہ میں اپنے پسندیدہ ٹورنامنٹس میں سے ایک پی ایس ایل کا منتظر ہوں، جارحانہ کرکٹ کھیلتے ہوئے ٹائٹل پر قبضہ جمانے کی کوشش کریں گے۔