لاہور (نوائے وقت رپورٹ) پاکستان دنیا میں گدھوں کی تعداد کے حوالے سے تیسرا بڑا ملک بن گیا ہے۔ محکمہ لائیو سٹاک پنجاب کے مطابق صوبائی دارالحکومت میں گدھوں کی تعداد روز بروز بڑھنا شروع ہو گئی جس کے بعد صرف لاہور شہر میں گدھوں کی تعداد 41 ہزار سے تجاوز کر گئی۔ حکومت نے گدھوں کی بہتر صحت کیلئے ڈونکی ہسپتال قائم کر دیا جہاں نہ صرف بیمار گدھوں کا مفت علاج کیا جا رہا ہے ۔بلکہ انہیں مختلف بیماریوں سے بچائو کی ادویات بھی دی جا رہی ہیں۔ انسان اور گدھے کا ساتھ صدیوں پرانا ہے مگر لاہور میں گدھوں کا کاروبار اچانک چمک اٹھنے سے گدھے پالنے والے بھی خوش ہیں گدھوں کے مالکان کا کہنا ہے کہ گدھا سکیم منافع بخش ہے، 35 سے 55 ہزار روپے تک کا گدھا روزانہ 800 سے ایک ہزار روپے تک کمائی کرکے دیتا ہے۔ ان کا کہنا ہے کہ گدھا چار سال کی عمر میں کماؤ بن جاتا ہے 12 سال تک مالک کیلئے روزگار کا ذریعہ بنا رہتا ہے۔ رپورٹ کے مطابق پاکستان دنیا میں گدھوں کی تعداد کے حوالے سے تیسرا بڑا ملک ہے جبکہ اس فہرست میں ایتھوپیا پہلے اور چین دوسرے نمبر پر موجود ہے۔