وزیراعظم نے مشاورتی اجلاس آج طلب کر لیا، اختر مینگل سے بھی ملاقات ہو گی رواں ماہ قطر کا دورہ کرینگے
کوئٹہ+ اسلام آباد (آن لائن+ آئی این پی) وزیراعظم عمران خان سے بلوچستان نیشنل پارٹی کے سربراہ سردار اختر جان مینگل کے قیادت میں وفد وزیراعظم ہاﺅس میں آج ملاقات کرے گا، لاپتہ افراد کے معاملے سمیت چھ نکاتی ایجنڈے پر عملدرآمد سمیت دیگر اہم امور پر تبادلہ خیال کیا جائیگا۔ تحریک انصاف کی جانب سے بھی پارلیمانی قیادت موجود ہو گی۔ علاوہ ازیں وزیراعظم عمران خان کی زیر صدارت مشاورتی اجلاس آج پیر کو طلب کر لیا گیا جس میں پی ٹی آئی رہنما اور وزراءشرکت کریں گے، اجلاس میں نواز شریف کے نیب ریفرنسز کے فیصلے پر مشاورت ہو گی۔ مزید برآں وزیراعظم عمران خان ماہ رواں کے آخر تک امیر قطر کی دعوت پر دوحہ جائیں گے۔ وزارت اطلاعات و نشریات ، وزارت پٹرولیم ، وزارت خزانہ ، وزارت پاور، وزارت خارجہ کے انچارج، وزرائ، سیکرٹری، اعلی عہدیدار بھی وزیر اعظم کے ساتھ جائیں گے، دونوں ملکوں کے تجارت ،تعلیم ،توانائی سمیت مختلف شعبوں میں تعاون بڑھانے پر بات چیت ہو گی۔ اس موقع پر وفود کی سطح پر مذاکرات ہوں گے ۔ ذرائع کے مطابق وزیر اعظم عمران خان اور ان کا وفد قطر کی حکومت سے پاک قطر ایل این جی کے انٹرنیشنل معاہدے پر نظرثانی کا مطالبہ کرے گا۔
وزیراعظم / دورہ
