لاہور ( سپورٹس رپورٹر +نمائندہ سپورٹس ) پاکستان ہاکی فیڈریشن نے ایف آئی ایچ پر و ہاکی لیگ کے لئے سابق اولمپئین سعید خان کو قومی ٹیم کا نیا ہیڈ کوچ اور منیجر مقرر کر دیا ہے ۔سعید خان 1978 اور 1982 کو ورلڈ کپ جیتنے والی قومی ہاکی ٹیم کا حصہ تھے۔ سعید خان ایشیئن کوالیفائر گیمز میں بحیثیت ہیڈ کوچ وومن ہاکی ٹیم کے ساتھ بھی منسلک رہے جبکہ 1994 میں ورلڈ کپ اور چیمپئنز ٹرافی جیتنے والی گرین ٹیم کی کوچنگ کے فرائض بھی سر انجام دئے تھے۔پرو ہاکی لیگ کیلئے تربیتی کیمپ میں کھلاڑیوں کی تعداد بڑھادی گئی ہے۔ کیمپ میں کھلاڑیوں کی تعداد 48 سے بڑھا کر 57 کر دی گئی ہے۔ لیگ کیلئے قومی ٹیم کا کیمپ آج سے نیشنل سٹیڈیم میں شروع ہو رہا ہے جہاں کھلاڑی رپورٹ کرینگے۔ کھلاڑی صبح اور شام دو سیشنز میں ٹریننگ کریں گے۔ کیمپ میں طلب کھلاڑیوں کی تعداد کا بڑھانے کا فیصلہ ٹیم مینجمنٹ کی سفارش پر کیا گیا۔ایونٹ 19جنوری سے شروع ہوگا۔