لاہور( سپورٹس رپورٹر ) سپورٹس بورڈ پنجاب کے زیراہتمام لاہور سمیت 5 شہروں میں انڈر16کھلاڑیوں کے 7کھیلوں کے کیمپ جاری ہیں، کیمپس میں کھلاڑیوں کے نمائشی میچز کا انعقاد کا آغاز ہوگیا ہے، پیر کے روز سیالکوٹ میں کوچنگ اینڈ ٹریننگ کیمپ میں والی بال کے کھلاڑیوں کے مابین نمائشی میچ کھیلا گیا، پنجاب گرین اور پنجاب وائٹ کی ٹیموں کے درمیان ہونے والے میچ میں کھلاڑیوں نے شاندار کھیل کا مظاہرہ کیا، پنجاب گرین نے پنجاب وائٹ کو2-1 سے شکست دی۔ گوجرانوالہ میں ویٹ لفٹنگ اور پاور لفٹنگ کے کوچز نے کھلاڑیوں کواہم ٹپس دیں، کوچز نے کھلاڑیوں کو ویٹ اٹھانے اور رکھنے کے بارے میں آگاہی دی، کوچز نے کھلاڑیوں کو پریکٹس بھی کرائی، کھلاڑی کیمپ میں محنت اور جوش و جذبے کے ساتھ تربیت حاصل کررہے ہیں۔