لاہور(سپورٹس رپورٹر+نمائندہ سپورٹس )سابق کپتان وسیم اکرم نے جنوبی افریقہ کیخلاف دوسرے ٹیسٹ میں فخر زمان کو چھٹے نمبر پر بیٹنگ کیلیے لانے کے فیصلے کو سمجھ سے بالاتر قرار دیدیا۔ وسیم اکرم نے کہا کہ جنوبی افریقہ کے خلاف پاکستان کی شکست پر صدمے کی ضرورت نہیں ہے اور نہ ہی سارا قصور کھلاڑیوں کا ہے ، وہاں کی پچز ٹیسٹ کرکٹ کے لیے مناسب نہیں تھیں تاہم بیٹسمین بھی غیر ضروری طور پر وکٹ گنواتے رہے لیکن اوپنر فخر کو چھٹے نمبر پر کھلانا سمجھ سے بالاتر ہے۔سرفراز احمد کی کپتانی کا دفاع کرتے ہوئے سابق کپتان نے کہا کہ اگر سرفراز کے سوا کوئی اور کپتان ہے تو بتادیں، سرفراز کو موقع ملنا چاہیے میری رائے ہے کہ کوچ بدلنے سے بھی کامیابی نہیں ملے گی۔ بھارت نے آسٹریلیا کو اسی کی سر زمین پر مات دے کر کارنامہ انجام دیاہے ویرات بڑا معرکہ جیتنے پر مبارکباد کے مستحق ہیں، بھارت کی یہ کامیابی اس کے فرسٹ کلاس نظام کی مرہونِ منت ہے۔ڈی ایچ اے ملتان میں کرکٹ اکیڈمی قائم کرنے کا اعلان کرتے ہوئے وسیم اکرم نے کہا کہ اکیڈمی کا نام وسیم اکرم کرکٹنگ اکیڈمی ہوگا جو سٹیٹ آف دی آرٹ ہوگی جس میں جدید سہولیات فراہم کی جائیں گی، اکیڈمی قومی کرکٹ کے فروغ میں کردار ادا کرے گی اور ہفتے میں 2 دن خود کھلاڑیوں کو تربیت دوں گا۔