لاہور (سپورٹس رپورٹر+نمائندہ سپورٹس )بیٹل ایکس پولو ٹورنامنٹ کے چوتھے روز پولو ڈی صوفی کی ٹیم نے پی بی جی/ ری مائونٹس کو 9-8 سے ہر ا کر فائنل کیلئے کوالیفائی کرلیا۔ لاہور گیریژن پولو کلب میں بیٹل ایکٹ پولو کپ میں دلچسپ میچز جاری ہیں۔ دس گول کے اس ٹورنامنٹ کے میچز دیکھنے کیلئے تماشائیوں کی اچھی تعداد کیولری پولو گرائونڈ میں موجود تھی۔ پولو ڈی صوفی اور پی بی جی /ری مائونٹس کے درمیان میچ بہت زبردست ہوا۔ چوتھے چکر تک میچ برابری تک ہی رہا مگر آخری لمحات میں پولو ڈی صوفی کی ٹیم نے ایک گول کے مارجن سے میچ جیت لیا۔ پولو ڈی صوفی کی طرف سے راجہ تیمور ندیم نے پانچ، احمد علی نے دو جبکہ ممتاز عباس اور صوفی محمد عامر نے ایک ایک گول سکور کیا۔ پی بی جی /ری مائونٹس کی طرف سے راجہ سمیع اللہ نے چھ جبکہ نکلوس نے دو گول سکور کیے۔ پی بی جی /ری مائونٹس پہلے ہی فائنل کیلئے کوالیفائی کر چکی ہے۔