چترال : بم دھماکے میں لیویز اہلکار شہید، علاقہ میں سکیورٹی مزید سخت
چترال(صباح نیوز)خیبرپی کے کے ضلع چترال میں ہونے والے بم دھماکے میں لیویز اہلکار شہید ہو گیا۔ حکام کے مطابق دھماکہ دوپہر ایک بجے کے قریب ارندو گاں میں اولڈ پاورہاؤس کے قریب ہوا جہاں آئی ای ڈی کے ذریعے لیویز اہلکار کو نشانہ بنایا گیا۔ڈپٹی کمشنر کا کہنا ہے کہ شہید ہونے والے اہلکار کی شناخت جاوید ولد عبدالحکیم کے نام سے ہوئی، جائے وقوعہ کو سیل کرکے ابتدائی شواہد اکٹھے کرلئے گئے اور علاقے میں سیکورٹی مزید سخت کردی گئی۔ واضح رہے گزشتہ دسمبر میں پاک افغان سرحدی علاقے مہمند میں آئی ای ڈی دھماکے کے نتیجے میں بم ڈسپوزل سکواڈ کے 2 اہلکار شہید ہوگئے تھے۔
