لاہور(سپورٹس رپورٹر) ایف آئی ایچ پرو ہاکی لیگ میں شرکت کے لیے پاکستان ہاکی فیڈریشن نے ٹیم کی روانگی کے لیے 27 جنوری مقرر کر دی ہے۔ لیگ کی تیاری کیلئے قومی ٹیم کے کھلاڑیوں کا تربیتی کیمپ گذشتہ روز بھی ٹھنڈے موسم اور تیز بارش جاری رہا جس میں کھلاڑیوں نے کوچنگ سٹاف کی زیر نگرانی بھرپور پریکٹس کی۔ پرو ہاکی لیگ کیلئے قومی ٹیم اپنا پہلا میچ 2 فروری کو ارجنٹائن کے خلاف کھیلنا ہے۔ لیگ کیلئے قومی ہاکی ٹیم کا تربیتی کیمپ نیشنل سٹیڈیم کی پچ 2 پر جاری ہے۔ ٹیم مینجمنٹ نے وقت کی کمی کے باعث خراب موسم کی بھی پروا کیے بغیر بارش اور سرد موسم میں ٹریننگ سیشن کا اہتمام کیا۔ اس موقع پر قومی ٹیم کے ہیڈ کوچ اور منیجر سعید خان کا کہنا تھا کہ بارش کے باوجود ٹریننگ سیشن سے ٹیم کی تیاری کا اندازہ لگایا جاسکتا ہے۔ ایسوسی ایٹ سیکرٹری پی ایچ ایف ایاز محمود کا کہنا ہے کہ کھلاڑی فٹ ہیں، بارش میں کسی انجری کا خدشہ نہیں ہے۔