راولپنڈی (صباح نیوز)پاک فوج نے نتھیاگلی میں پھنسے تمام سیاحوں کو ریسکیوکرکے محفوظ مقامات پر پہنچا دیا۔آئی ایس پی آرکی جانب سے جاری بیان کے مطابق پاک فوج نے علی الصبح سوا تین بجے آپریشن کے ذریعے نتھیا گلی کے قریب توحید آباد میں پھنسے تمام سیاحوں کو ریسکیو کرکے محفوظ مقامات پرپہنچا دیا۔ آپریشن میں پاک فضائیہ، کیوئیک ریسپانس فورس اورریسکیو1122 نے بھی حصہ لیا۔آئی ایس پی آرکے مطابق برف میں پھنسے سیاحوں کو مری، کالاباغ اور ایبٹ آباد میں محفوظ مقامات پر پہنچا دیا گیا۔ اس سے قبل پاک فوج نے بیان جاری کیا تھا کہ توحید آباد میں سیاحوں کے بھٹکنے کا علم میڈیا رپورٹس سے ہوا۔ سول انتظامیہ بھی ریسکیو آپریشن میں تعاون کیا، ریسکیوٹیم کے پاس دوایاں اورخوراک موجود ہے، شدید برفباری اور نہ چلنے والی گاڑیوں کی وجہ سے سڑکیں بلاک ہیں جب کہ سڑکیں کلیئرکرانے کی کوشش کی جارہی ہے۔