لاہور(سپورٹس ڈیسک)بھارتی ٹیم کے فاسٹ بائولر محمد شامی نے اپنے ایک روزہ بین الاقوامی کرکٹ کیریئر میں وکٹوں کی سنچری مکمل کرلی۔ انہوں نے نیوزی لینڈ کے خلاف اس کی سرزمین پر پانچ ایک روزہ بین الاقوامی میچوں کی سیریز کے پہلے میچ میں یہ اعزاز حاصل کیا۔ شامی یہ اعزاز حاصل کرنے والے 20ویں بھارتی بائولر بن گئے ہیں۔ محمد شامی نیوزی لینڈ کے خلاف پہلے ایک روزہ کرکٹ میچ میں عمدہ بائولنگ کا مظاہرہ کرتے ہوئے 3 کھلاڑیوں کو پویلین کی راہ دکھائی۔ اس عمدہ کارکردگی پر انکو میچ کا بہترین کھلاڑی قرار دیا گیا۔ شامی نے اب تک 56 میچز کی 55 اننگزوں میں 25.67 کی اوسط سے 102 وکٹیں لے رکھی ہیں۔ بھارت کی جانب سے انیل کمبلے 334 وکٹیں لیکر سرفہرست ہیں۔