انٹرنیشنل ٹینس فیڈریشن کے ایگزیکٹو ڈائریکٹر آج پاکستان پہنچیں گے
لاہور(سپورٹس رپورٹر+نمائندہ سپورٹس )انٹرنیشنل ٹینس فیڈریشن کے ایگزیکٹو ڈائریکٹر ڈویلپمنٹ لوکا سانٹیلی پاکستان کے اولین دورے پر آج اسلام آباد پہنچیں گے ۔ لوکا سانٹیلی انٹرنیشنل ٹینس فیڈریشن کے ایگزیکٹو ڈائریکٹر ڈویلپمنٹ کی حیثیت سے پہلی بار پاکستان آ رہے ہیں جو اسلام آباد میں ٹینس کے نیشنل ٹریننگ سنٹر اور آئی ٹی ایف کی فنڈنگ سے بننے والے ٹینس کورٹس کا افتتاح کرنے سمیت پاکستان ٹینس فیڈریشن کے حکام سے ملاقاتیں کرینگے ۔ آئی ٹی ایف کے ایگزیکٹو ڈائریکٹر کی جانب سے پاکستان میں ٹینس ڈویلپمنٹ کیلئے فنڈز بھی جاری ہونیکا امکان ہے ۔ پاکستان ٹینس فیڈریشن کے صدر سلیم سیف اللہ کے مطابق انٹرنیشنل ٹینس فیڈریشن کے ایگزیکٹو ڈائریکٹر ڈویلپمنٹ کل پی ٹی ایف ٹینس کمپلیکس اسلام آباد میں نیشنل ٹریننگ سنٹر کا افتتاح کرنے سمیت میڈیا سے بات چیت بھی کرینگے ۔
