لاہور(نمائندہ سپورٹس +سپورٹس رپورٹر)پہلے ٹی ٹونٹی میں جنوبی افریقہ نے سنسنی خیز مقابلے کے بعد پاکستان کو 6 رنز سے شکست دے دی۔ کیپ ٹاؤن میں تین ٹی ٹونٹی میچز کی سیریز کے پہلے میچ میں جنوبی افریقہ نے مقررہ اوورز میں 6 وکٹوں کے نقصان پر 192 رنز بنائے، کپتان فاف ڈوپلیسی 78 اور ہینڈرکس 74 رنز بنا کر نمایاں رہے۔ عثمان شنواری نے 3، عماد وسیم، حسن علی اور فہیم اشرف نے ایک ایک کھلاڑی کو آؤٹ کیا۔جواب میں پاکستان کی ٹیم 20 اوورز میں 186 رنز بناسکی۔ کپتان شعیب ملک 49، حسین طلعت 40 اور بابر اعظم 38 رنز بناکر نمایاں رہے۔ ہینڈرکس، موریس اور شمسی نے دو دو کھلاڑیوں کو آؤٹ کیا۔ پاکستانی ٹیم کے کپتان شعیب ملک نے ٹاس جیت کر پہلے فیلڈنگ کرنے کا فیصلہ کیا تھا۔ میچ سے قبل محمد حفیظ انجری کا شکار ہوگئے جس کے باعث انہیں پلیئنگ الیون میں شامل نہیں کیا گیا۔دونوں ٹیموں کے درمیان دوسرا میچ کل کھلا جائے گا ۔ میچ پاکستانی وقت کے مطابق شام ساڑھے پانچ بجے شروع ہوگا۔