لاہور(نمائندہ سپورٹس+سپورٹس رپورٹر)قومی ٹیم کے کپتان سرفراز احمد کا کہنا ہے کہ ورلڈ کپ میں کپتانی کرنا میرے لیے اعزاز کی بات ہے، ورلڈ کپ سے قبل انگلینڈ کیخلاف بھرپور تیاری کا موقع ملے گا اور امید ہے کہ عالمی کپ میں پاکستانی ٹیم اچھی کارکردگی دکھائے گی۔ چیئرمین پی سی بی کی سپورٹ سے حوصلہ ملا اور بطور کپتان اعتماد میں اضافہ ہوا۔ نسل پرستانہ فقرہ کسنے پر پابندی سے متعلق کہا کہ ہر معاملے میں اللہ کی طرف سے بہتری ہے، پابندی کی وجہ سے آرام اور فیملی کیساتھ وقت گزارنے کا موقع مل گیا، انسان اپنی غلطیوں سے سیکھتا ہے، مجھ سے بھی غلطی ہوئی جس سے سیکھنے کی کوشش کر رہا ہوں۔دورہ جنوبی افریقہ میں ٹیم امیدوں کے برعکس اچھا کھیلی، ہم میچز ضرور ہارے لیکن مجموعی طور پر ہماری کارکردگی بہتر تھی۔میچز کے دوران کئی مواقع ایسے آئے جن کا ہم اگر فائدہ اٹھا لیتے تو پانسہ پلٹ سکتا تھا، جبکہ چند بار قسمت نے ہمارا ساتھ نہ دیا۔ورلڈ کپ سے قبل دورہ انگلینڈ میں ون ڈے سیریز سے اچھی تیاری ہوجائیگی اور کھلاڑیوں کو ماحول سمجھنے کا بہتر موقع ہاتھ آئیگا۔امام الحق ذہنی طور پر مضبوط ہیں، چیف سلیکٹر انضمام الحق کا بھتیجا ہونا اپنی جگہ لیکن ہماری توجہ کارکردگی پر ہوتی ہے اور وہ باصلاحیت کھلاڑی ہیں۔بابر اعظم ر کی پرفارمنس روز بہ روز بہتر ہوتی جارہی ہے اور ان کی بہترین بلے بازی دیکھ کر ہمیشہ خوشی ہوتی ہے۔محمد حفیظ اور شعیب ملک ٹیم کے سینئر ترین کھلاڑی ہیں جن سے ہمیشہ سیکھنے کا موقع ملتا ہے۔