لاہور(نمائندہ سپورٹس )پاکستان سپر لیگ کے میچز نے قومی کھیل ہاکی میں ملک کی پہچان بننے والے اولمپئنز کو بھی اپنے سحر میں جکڑ لیا ۔ہاکی سٹارز اپنی فیورٹ ٹیموں کو سپورٹ کرنے کے ساتھ پی ایس ایل کے میچز کو بڑی دلچسپی کیساتھ دیکھ رہے ہیں۔ہاکی فیڈریشن کے سیکرٹری شہباز سینئر کے مطابق پی ایس ایل کے اگلے مرحلے میں غیر ملکی کھلاڑیوں کے لاہور اور کراچی میں آکر کھیلنے سے ہاکی لیگ کے لیے مدد بھی ملے گی۔ کرکٹرز لاہور اور کراچی میں آکر کھیلیں گے تو پوری دنیامیں ایک مثبت پیغام جائیگا کہ پاکستانی قوم کھیل اور کھلاڑیوں سے محبت کرنے والی قوم ہے، اس سے پوری دنیا کو باور کرانے میں مدد ملے گی کہ ہمارا ملک ہر لحاظ سے اب محفوظ ملک ہے۔ پی سی ایل ختم ہونے کے بعد پاکستان سپرہاکی لیگ کا میلہ یہاں سجانے کی تیاریاں کررہے ہیں ۔کوچ دانش کلیم کے مطابق لاہور قلندرز ان کی فیورٹ ٹیم ہے، ہمیشہ اس ٹیم کو سپورٹ کرتے ہیں۔اولمپیئن خالد حمید کا کہنا تھا کہ پی ایس ایل کے میچز باقاعدگی سے دیکھ رہے ہیں ، لاہور کی ٹیم فیورٹ ٹیم ہے،پاکستان میں پی ایس ایل کے میچز سے ہاکی لیگ کے لیے دروازے بھی غیرملکی کھلاڑیوں کے لیے کھلیں گے۔اولمپیئن زاہد شریف کا کہنا ہے کہ پاکستان میں زیادہ تعداد میں پی ایس ایل میچز کا ہونا بڑی خوش آئند بات ہے، جس طرح پی ایس ایل پاکستان کا ایک برانڈ بن چکا۔اولمپیئن محمد شبیر کے نزدیک ہر وہ لیگ سے جس سے پاکستان کی مقبولیت اور وقار میں اضافہ ہواس کو سپورٹ کرنا چاہیے، جب ہاکی لیگ کی رونقین لگیں گے تو نوجوان قومی کھیل میں بھی دلچسپی لیں گے۔