لاہور(نمائندہ سپورٹس) آسٹریلیا کے خلاف سیریز کے لیے قومی ٹیم میں منتخب ہونے والے ڈومیسٹک کرکٹ کے نمایاں پرفارمر عابد علی کا کہنا ہے کہ سیریز میں عْمدہ کارکردگی دکھا کر ورلڈ کپ کے لیے ٹیم میں جگہ بنانے کی کوشش کروں گا۔ قومی سطح کی کرکٹ میں مسلسل عمدہ بلے بازی کے ذریعے سلیکشن کمیٹی کا اعتماد حاصل کرنیوالے بیٹسمین عابد علی نے خوشی کا اظہار کرتے ہوئے کہا کہ سلیکشن کمیٹی کا شکریہ ادا کرتا ہوں، کوچ اور کپتان نے جو اعتماد کیا اس پر پورا اترنے کی کوشش کروں گا۔ آسٹریلیا کے خلاف سیریز میں شرکت سنہری موقع ہے،اس موقع کا بھرپور فائدہ اٹھانے کی کوشش کرونگا۔پاکستان اور اسٹریلیا کے درمیان پانچ میچز پر مشتمل ایک روزہ سیریز بائیس مارچ سے متحدہ عرب امارات میں شروع ہوگی.