اسلام آباد (سٹاف رپورٹر) پاک فضائیہ نے ملکی دفاع کا ایک اور سنگل میل عبور کر لیا۔ پاک فضائیہ نے جے ایف 17 تھنڈر طیارے سے طویل فاصلے کے میزائل کا کامیاب تجربہ کر لیا۔ ترجمان کے مطابق پاک فضائیہ نے طویل فاصلے تک مار کرنے والے ملکی ساختہ میزائل کا کامیاب تجربہ کیا ہے۔ طویل فاصلے تک مار کرنے والا سمارٹ ویپن جے ایف 17 تھنڈر ملٹی رول لڑاکا طیارے سے فائر کیا گیا۔ کامیاب میزائل تجربہ ملکی دفاع میں اہم سنگ میل ہے۔ جے ایف 17 تھنڈر کو دن اور رات میں طویل فاصلے کے اہداف کو نشانہ بنانے کی صلاحیت حاصل ہو گئی۔ ائر چیف مارشل مجاہد انور خان نے کامیاب تجربے پر سائنسدانوں اور انجینئرز کو مبارکباد دی ہے۔ ایئر چیف مارشل نے کہا ہے کہ پاکستان امن پسند ملک ہے، دشمن نے جارحیت مسلط کی تو بھرپور جواب دیں گے۔