راولپنڈی (صباح نیوز) پاک فوج کے شعبہ تعلقات عامہ (آئی ایس پی آر) نے چند روز قبل یوم پاکستان کی مناسبت سے آفیشل نغمہ جاری کیا تھا اور اب اسی نغمے کی ایک اور ویڈیو بھی ریلیز کردی۔ ایک ٹوئٹ کے ذریعے ڈائریکٹر جنرل آئی ایس پی آر نے نغمے کے دوسرے پرومو کو شیئر کیا۔ نغمے کا عنوان پاکستان زندہ باد رکھا گیا جبکہ دوسری ویڈیو کا کیپشن ہر پاکستانی کی آواز، پاکستان زندہ باد دیا گیا۔ اس ویڈیو میں ہر شعبے سے تعلق رکھنے والے پاکستانیوں نے بتایا کہ پاکستان ان کی جان ہے۔ یاد رہے کہ ڈائریکٹر جنرل آصف غفور نے 23 مارچ کی مناسبت سے یہ نغمہ رواں ماہ 13 تاریخ کو شیئر کیا تھا۔ نغمے کی ویڈیو میں پاکستان کی تینوں مسلح افواج کے جوانوں کو مارچ پاسٹ اور فلائنگ پاسٹ کا شاندار مظاہرہ کرتے ہوئے دکھایا گیا۔ واضح رہے کہ 23 مارچ کو یوم پاکستان کے موقع پر وفاقی حکومت کی جانب سے 18 غیر ملکیوں سمیت 127 افراد کو اعزازات سے نوازا جائے گا۔