کراچی (این این آئی) وفاقی وزیر ریلوے شیخ رشید احمد نے سابق صدر آصف علی زرداری اور سابق وزیر اعظم میاں نواز شریف کو انجن بدلنے کا مشورہ دیا ہے اورکہاہے کہ نواز شریف اور زرداری کے رنگ پسٹن اور پلگ گھس چکے ہیں،ان کا کہنا تھاکہ بلاول مجھ سے بچ کر کھیلے، لوگ بیچ بچا کروا رہے ہیں۔ میں نے ایک بار پھر بلاول کو معاف کیا۔ بلاول بچہ بن کر کھیلے تو اچھا ہے ورنہ سیاسی موت مارا جائے گا زرداری نے اب بلاول کو آگے کر دیا ہے۔ زرداری نے 8 سال تک بے نظیر بھٹو قتل کیس نہیں چلایا۔ان خیالات کا اظہارانہوں نے لوکوشیڈ کراچی میں مزدوروں کی تقریب میں شرکت کے موقع پرصحافیوں سے گفتگو اورمزدوروں سے خطاب کرتے ہوئے کیا۔وفاقی وزیر ریلوے شیخ رشید کراچی میں لوکو شیڈ ریلوے ورکشاپ پہنچے تو ریلوے ورکرز نے ان کا والہانہ استقبال کیا ،اس موقع پر خطاب کرتے ہوئے انہوں نے کہا کہ بلاول بچہ بن کر کھیلے تو اچھا ہے ورنہ سیاسی موت مارا جائے گا۔انہوں نے کہا کہ ابھی تو بلاول کو کچھ نہیں کہا ہے، مجھ ڈر ہے کہ کہیں بلاول کپڑے پھاڑ کر میرے خلاف تھانے نہ چلا جائے اور ایف آئی آر نہ کٹوا دے اورپھرکہے گا مجھے شیخ رشید نے چھیڑا ہے، پھر عمران خان کو کہے گا اس نے مجھے چھیڑا اس کو وزارت سے نکالو۔شیخ رشید کا کہنا تھا کہ بلاول میں وزارتوں کا بھوکا نہیں ہوں،آٹھویں وزارت کر رہا ہوں آصف زرداری نے بلاول کو آگے کیا ہوا ہے، بلاول کو سمجھا رہا ہوں بازآجا آصف زرداری سٹے باز ہے،آصف زرداری نے 8 سال تک بے نظیر بھٹو قتل کیس نہیں چلایا۔ انہوں نے کہاکہ ریلوے کا محکمہ اپنے افسران اور مزدوروں کی محنت سے آگے بڑھ رہا ہے۔انہوں نے کہا کہ لٹیروں نے ملک کو لوٹا اور عوام کو گیس کے اضافی بل دینے پڑ رہے ہیں اور وہ چور ، ڈاکو اور لٹیرے آج ضمانتیں کراتے پھر رہے ہیں، انہوں نے تو قبرستان کو بھی نہیں بخشا۔انہوں نے کہاکہ ریلوے مزدوروں کی وجہ سے چل رہی ہے، مزدوروں کو ایک ماہ میں تین ہزار روپے اضافی الاونس دیا جائے گا۔انہوں نے کراچی سے دو نئی ٹرینیں چلانے کا اعلان کرتے ہوئے کہا کہ وزیر اعظم عمران خان جلد چین جائیں گے جہاں 1700 کلو میٹر ریلوے ٹریک کا معاہدہ کیا جائے گا۔