لاہور(سپورٹس رپورٹر+نمائندہ سپورٹس) افغانستان نے ٹیسٹ کرکٹ کا اسٹیٹس حاصل کرنے کے بعد اپنے دوسرے میچ میں آئرلینڈ کو 7 وکٹوں سے باآسانی زیر کر کے تاریخی کامیابی حاصل کرلی۔بھارت کے شہر دیرادون کے راجیو گاندھی کرکٹ اسٹیڈیم میں کھیلے گئے واحد ٹیسٹ کے چوتھے روز افغان ٹیم نے 147 رنز کے ہدف کے تعاقب میں کھیل کا آغاز کیا تو اس کا اسکور ایک وکٹ کے نقصان پر 29 رنز تھا ۔ احسان اللہ نے رحمت شاہ کے ساتھ مل کر دوسری وکٹ میں ٹیم کو فتح کے قریب پہنچا دیا، احسان اللہ 65 اور حشمت اللہ شاہدی نے ناقابل شکست 4 رنز بنائے ۔قبل ازیں آئرلینڈ کی ٹیم پہلی اننگز میں صرف 172 رنز بنا کر آؤٹ ہوئی تھی جس کے جواب میں افغانستان کی ٹیم314 رنز بنا کر آؤٹ ہوئی۔آئرلینڈ کی پوری ٹیم دوسری اننگز میں 288 رنز بنا کر آؤٹ ہوئی ۔وزیراعظم عمران خان نے افغان ٹیم کو ٹیسٹ کرکٹ میں پہلی کامیابی پر ٹویٹر میں اپنے پیغام میں مبارک باد دیتے ہوئے کھلاڑیوں کی کارکردگی کی تعریف کی۔