لاہور‘ پھولنگر ‘ مانانوالہ (سپورٹس رپورٹر + نامہ نگار) پھول نگر لمبے جاگیر بائی پاس پر چہل قدمی کرنے والے نوجوان پر آسمانی بجلی گر گئی۔ 16 سالہ نوجوان موقع پر جاں بحق جبکہ اسکے ساتھی زخمی ہو گئے۔ متوفی اشرف بیگ کی جسمانی حالت خراب ہونے پر سپردخاک کر دیا گیا۔ صوبائی دارالحکومت میں منگل اور بدھ کی رات آنے والی تیز آندھی کے بعد بدھ کو دن بھر سورج اور بادلوں کے درمیان آنکھ مچولی جاری رہی تاہم لاہور کے بعض حصوں میں ہونے والی ہلکی بوندا باندی سے موسم خوشگوار ہو گیا۔ محکمہ موسمیات کے مطابق آج جمعرات کے روز ملک کے بیشتر علاقوں میں موسم سرد اور خشک رہے گا۔ کوئٹہ‘ ژوب ڈویژن اور گلگت بلتستان میں چند مقامات پر گرج چمک کیساتھ بارش اور پہاڑوں پر ہلکی برفباری کا امکان ہے۔