کراچی، اسلام آباد ( نوائے وقت رپورٹ+ نمائندہ خصوصی) خورشید شاہ نے میڈیا سے گفتگو کرتے کہا کہ ناکامیوں کو چھپانے کے لئے حکمران ٹیکس پر ٹیکس لگا رہے ہیں۔ پی پی نے عوام پر اضافی بوجھ نہیں ڈالا۔ پی پی نے گیس کی قیمتوں میں اضافہ کیا تھا۔ پی پی نے کبھی بھی اقتدار کی سیاست نہیں کی۔ عوام کے لئے ہم نے جیلیں کاٹیں ابھی بھی جیالے ملک کو بچانے کے لئے نکلیں گے۔ بلاول بھٹو 26مارچ کو کراچی سے ٹرین مارچ کا آغاز کریں گے۔ پیپلزپارٹی کی رکن قومی اسمبلی نفیسہ شاہ نے پارٹی چیئرمین پر نکتہ چینیوں کو مسترد کرتے ہوئے کہا ہے کہ بلاول بھٹو زرداری کو کسی سے حب الوطنی کا سرٹیفکیٹ لینے کی ضرورت نہیں ہے۔ نفیسہ شاہ کا کہنا تھا کہ ہمارے لیے کفر اور غداری کے فتوے نئی بات نہیں، شہید بھٹو اور شہید بی بی کو بھی غدار کہا گیا تھا۔انہوں نے کہا کہ گڑھی خدا بخش بھٹو کے شہدا آج بھی چاروں صوبوں کی زنجیر ہیں اس لیے پیپلز پارٹی کے خاتمے کے خواب دیکھنے والوں کا مقدر مایوسی ہے۔